Jüst denn, wenn de Winter in Begribb weer uns to verlaaten, of all verlaaten harr, keem uns de Gedank, dat dat woll so langsam up 1. Mai togung. Siet eenig Johren haar sick dat so inbörgert, dat up Schottjer Dreesch na oll Bruuk 'n Maiboom upstellt woor. Mal hier mal dor, rechtschapen Stee haarn wi noch neet funnen.

 

Mal unner 'n Teltplan, Gerasch, of in n' utgedeenten Bulli, ja sogar in lösstant Swienstall hebben wi dat all 'n mal dörtrucken. Wi funnen immer Unnerkunft, wenn ik mennigmal primitiv, uns gefull dan van mal to mal beter. Uns Dreescher Weg weer in de domalig Tied noch mit Schotterbelag versehn. An beid Sieden Togschlooten, mit deelwies dicht bewursen Ellernbuschriegen. Hier denn wi uns heimisch föhlen, hier weer uns Tohus. Aber de Moderniseerung hett sick denn ok bi uns dörsett, jedenfalls eensiedig bit vandaag. Wi dont dat begröten un trürn dat Oll neet na, aber lebendig hollen willen un dont wi dat.

 

1967 bi d' Mai fier, of ok 'n paar Daag keem uns de Infall dat man sick doch faker n' mal treffen sull, eenmal in 't Johr weer wolln 'n bitje minn. So keem wi denn overeen, in Sömmer 'n gemeensamen Utflücht to maken. Worhen wullen wi denn later noch mal biproten.

 

Bi de nächsten Tosamenkunft woor denn Klottje tosamenstellt, de uns erste gemeensam Utflücht vörbereiten sull. An Saterdachnamiddag sull dat losgaan, dor weern wi uns over in klaren, un denn abends mit lüttjet Fier offsluten. Un so is dat denn ok passeert.

 

De Busfahrt

An 24. Juni 1967 weer dat denn sowiet, namiddags 13:30 Uhr rull to ersten mal n' grooten Omnibus in Richtung Schottjer Dreesch. Hermann Peters, Busunnenehmer in Münkeboe harr sick bereit erklärt, uns an d' Küst lang to schoffern bit na Wilhelmshaven, torüch gung dat over Schirum, wor wie uns denn noch 'n poor gemütlich Stünn maakt hebben, biför de Torüchfohrt Richtung Heimat weer inslan woor.

 

Holl stop, eens woor hier noch vergeten: De eben erwähnt lüstig un gemütlich Fier woor noch lüstiger un utgelatener, as ut uns Heimat n' Telegramm, nä keen Telegramm, ik nehm an dör n' Telefonanrop, of ik weet ok neet, is ja ok egal! Jedenfalls keem Sondermeldung, dor het dat, Schottjer Dreesch hatt sick um een Erdenbörger vergrötet. Greta un Klaas weern Oma un Opa worn. Da gung dat van graleern un hochleben laten, Oma geef erst en ut, do keem Opa dran, do mussen de beid tosamen en utgeven, un well denn noch aal en utgeven muß, weet ik neet. Ik weet woll, dat uns dat heel laat worn is. Gottseidank haarn wi 'n stock-nöchtern Schofför.

 

De Verein word gründ

 Sowiet de Vörgeschicht bit to Gründung van uns Verein, de denn poor Week later dörföhrt woor. Na 'n heel Bült Vörgeproot, eenmal unner freen Himmel, annermal in Neebo de in Rohbau stunn. Aber to goderletzt woor uns Verein an 03.08.1967 abends um 20:45 Uhr in Klaas Beningas Gerasch gründ. To gliekertied woor denn ok 'n vörlopigen Vörstand tosamenstellt.

 

De sach so ut:

1. Vörsitter Heinrich Roolfs

2. Vörsitter Hinrich Beninga

Schriever Reinke Leuschel

Penningmester Rudolf Kurz

 

Uns erste Johreshauptversammlung woor 1968 offhollen. Dorbi woor denn ok 'n regulärn Vörstand wählt. Uns Vereinslokal weer in de erste Johren Schottjer Piepe. Unner annern woor ok gliek 'n Satzung utarbeit. Hier woor denn ok beschloten, dat wi vörlopig up de Indragung in 't Vereinsregister verzichten wullen, weil man uns allgemeen neet völ Chancen inrümen de. Wi hebben ok seker neet up fast Beenen stahn. Somit leep dat erst als Probe up Exempel.

 

Uns regulär Vörstand seech nu so ut:

 1. Vörsitter Heinrich Roolfs

2. Vörsitter Hinrich Beninga

Schriever Reinke Leuschel

Penningmester Rudolf Kurz

 

Um de Blemage möglichst begrenzt to hollen, wenn d' mal neet so klappen sull, hebben wi to Anfang bloot Dreeschers in uns Verein upnahmen. Aber dat keem all anners, uns Mitgliederzahl wurs rapide, dor woorn Aktivitäten entwickelt, dorvan to drömen wi uns anfangs neet mal wagt harn.

 

Worhen?

De nächste groote Kuup weer denn de Bo van uns Ellernhus. Bitlang harrn wi uns Mitgliederversammlungen immer in 't Weertshus up Piep offhollen. Weil dat dor immer so luut togung, keemen wi mit Klaas Barkhoff overeen, in Tokunft de Versammlungen in sien groot Köken offtohollen. Dat klappt ock good, aber up de Düer woor dat dor to eng. Klaas Barkhoff hett uns immer gern upnahmen. Bedürlicherwies is he Anfang van uns Jubiläumsjohr kört vör sein 90. Geburtstag verstürben. He weer uns ollste Vereinsmitglied. Dor weer good Rat düer, worhen? Dor völ hen un her sünd wi denn mit Lammert Leerhoff overeen kamen, dat he uns 'n Stück Land to Verfügung stellen de.

 

Tüschen Wiehnachten 1969 un Nejohr woord denn de erste Spastek makt. Von dor off an gung dat denn Zug um Zug. Uns Ellernhus hett 'n heel Bült Möh und Arbeit köst. Nu heet dat Arbeit. Diedeldentjes un Fliemstriekeree weet neet mehr fragt.

 

Ik mutt seggen, wi hebben wunnerbar tosamen arbeit, to gern denk ik an de upbotied torüch. Wat wi uns vörnahmen harrn, woor dörföhrt. Dat weer 'n gesunden Kern, de uns Ellernhus hochtrucken hett. De Tosamenarbeit un de Arbeitsmoral weern eenzig. Bit vandaag hett sick dor nix an ännert. Wenn 't d'r up ankummt, besteiht dat vandaagt noch!

 

Woher de Naam kam

 Vör Johren, as Dresch noch neet so bewohnt weer, stunnen de Landereen Winter over, aber ok all bi 'n gooden Gewitterschuur in d' Sömmer, unner Water. De Weeg bleeven faaktieds ok neet verschont, so dat dat mennigmal för Stünnen off sogar Dagen neet möglek weer mit drög Footen na Schott to kamen. Schottjer Dreesch weer to de domalig Tied 'n Waternüst.

 

Un wor de Grund natt un waterdörschwemmt is, wasen ok gern Ellen. Vörtied sullen hier regelrecht Ellernwanderungen bestahn hebben. Dordör ergifft sick de Naam Ellernhus all vansülst.

 

Dat Bruutpadleggen

 Siet Himmelfahrt 1971 hebben wi dat Bruutpadleggen ok weer so, as dat hier fröhr weer, inföhrt. Disse oll Bruuk weer in de letzte 30 Johren regelrecht inschlapen.

 

Unnerstützt hebben uns bi 't erste mal fründelkerwies de domalige Lehrerin an d' Schottjer School, Fro Ursula Klaffke un hör Kollegin Ebba Neumann. Dörföhrt woor dat up Schottjer Spölplatz unner Anleitung van de beidend.

 

Begoodacht un prämeert woor dat denn van 'n Klootje Heimatvereinsmitglieder, worbi jede, de mitmakt hatt, mit 'n Tafel Zuckerla belohnt woor. Un de 10 Besten worn an Pingstsönntag mit 'n Urkuun belohnt. Dor hett sick bit vandaag ok noch nix an ännert.

 

Bemöhen för 'n süvern Umwelt

 All 1973 hebben wi van d' Heimatverein uns Gedanken makt, dat wat mit uns Umwelt neet mehr stimmen kunn. Wi hebben doruphen in een Schrieben an d' Gemeend Upgant-Schott dorgegen protesteert, dat Boomen und Buschen ohn Sinn un Verstand umhauen off utreeten woorn. Wenn 't denn heel nett anners gung, sullen tominst nee Boomen anplant worn. Bi disse Upgaav wullen wi van d' Heimatverein de Gemeend unner d' Arms griepen un ok anners dorför sorgen, dat in uns Kuntrei de Umwelt noch in d' Rieg bleev.

 

Disse Tosamenarbeit mit Gemeend wor uns denn ok van d' Gemeenddirektor Plogstieß up uns 10-johrig Jubiläumsfier toseggt. Wi weern nu Füer un Flaam bi d' Johreshauptversammlung 1977 woor een Umwelt- und Landschaftspflegerteam insett, in de Hinrich Beninga, Uwe Boumann, Okko Betten un Alfred Janssen wählt woorn. Disse Team weer denn ok heel aktiv un de Gemeend woor mit 'n Bült Unregungen anschreben, to 'n Bispill over dat Utsehen van d'n Kinnerspölplatz up Ihrlingswarf. As de Samtgemeend 1978 bi t' Füerwehrhuus Schott 'n heel Bült Boomen umhauen leet un uns Protest dortegen ok up doov Ohren stöten de, sünd wi denn anner, dat heet eegen Paden gahn.